********** بحيا واموت **********
بحيا واموت ......
واعيش السكوت
من خوفى على بكره
لزى امبارح يفوت ذكرى
بنفس الوحشــــــــــــــة
وناس فى الدنيا مش عايشة
وذكرى تدوس على أنفاسنا
وناس مشتاقة ......
لليلة العيد والفرحة
وأطفال سعيدة ومرحة
منتظرة عيدية
ولبس جديد
وفى لحظة ......
قطر بيصرخ بيقول توت
وناره قايدة
وقطر تانى علينا يفوت
صدى صوته كتم الصوت
والضحكة
ولحظة حب واللهفة
وناس غرقانة فى المية
وناس مطحونة على القضبان
وناس قايده فيها النيران
وناس بتتألم بين الحيطان
وأم بتتمنى حضن الضنا ...
والضنا للقاء فرحان
وأب فى لحظة شوق .....
لمولوده من زمان
وغدر القطر بعروسة
منتظرة
ليلة العمر والفستان
***************************
وانا بحيا وموت ....
الف مرة فى اللحظة
على وطن بنخنق فيه بأيدينا
وناس تبيع وتشترى فينا
وزمن بنعاند فيه بعضينا
لكن انا هاحيا من تانى ...
وأحلم ببكره واتمنى
يطلع فجـــر جـــديد
يشق ظلام الليل بالضى
ونتعاهد م نتفارق
والايد فى الايد
ونغنى أحلى الأغانى ...
لأجل الفرحة والعيد
*************************
من الذاكرة ( الصعيد فبراير 2002 )
بقلم الشاعر \\ سيد الدابى
ليست هناك تعليقات:
إرسال تعليق