قصيدة انت وانا بقلم / وائل محمد الحمامى

أنت و أنا
........
وانت ماشى على الغياب
خلى الخطاوى مطمنه
وسيبنى هنا
مع حبنا
أرقص مع سكوت العتاب
على دب نبض
ف قلبنا
وفستان على جسم الشباب
بقوته بيضمنا
ريحة عرق صوت العذاب
وألف توهه تزفنا
ضحكة حزين
حبيبى نبضنا
بيحكى للأحباب
حدوته
وتوته توته
كان فيه زمان هنا
أنت وأنا
ف حضن الضباب
والشمس طالعه
تحرق قمر
ينور لنا
سكة وباب
الوداع
وليل سهر على ضحكنا
وأهات وتنهيده
ورعشه انت ليها بيت
واستغمايه
واستخبه فيك أنا
على جزيرة الحب
على أرضنا
لسه دفه
من ظلنا الى داب
فيك
ووحشتنا
...........................
بقلم / وائل محمد الحمامى