قصيده صبية مغروره لشاعر سالم هاشم

صبية مغرورة
...................
شافوها ع الطريق بتتمختر
.شدت عيون الكل راح يسأل ..
..
يا حلوة تطلعى مين؟..
..
جامحة بنظرة عين..
الرمش سيف
والشعر بيرفرف
فى الهوى سواح
والغصن بان ملفوف ومتقسم ..
والحسن لوحة ضاحكة بتتبسم.
..
ضربت بخلخالها تتعاجب
وقعت قلوب الناس..
والكل هام واحتاس
منين يجيبوا خالها....
دى فرسة
جامحة محتاجه خيالها.
..
والكل بقوا فرسان..
وكل واحد
لنفسه بقى طمعان..
..
الفرسة ولا حد فى عنيها
الكل كلافين.
يادوب
لو رضيت نفسها
يشتغلوا خدامين..
..
وتقول لمين ومين يسمع
دى سليلة الحسب والنسب
وراسها فى العالى..
بجمالها
فى السما نجمة بتلالى..
..
الكل عينو فيها
وهى عنيها كما الدنيا
جريئة
عايزا ال يشكمها
بنظره
من عنية الحمرة يحكمها..
مشيت ومشيو الناس
مكسورة ام الراس..
..
والست فرسة
رمحت
والقوم تمر عليهم
تصيبهم اللعنه
وتعنس النسوة..
..
فضلت سنين واعوام
تنفر من الأقوام..
وتجرى فى الأيام
تبحث عن الخيال..
..
ركبها واد مغوار
حكمها بكف النار
..
فضلت معاه أيام
لما كسر شوكها
لجمّها وفل وراح..
..
فضلت المهرة
مربوطه فى مكانها
تستنى باقى العمر
يرجع لكنو ما جاش
..
هى بغرورها
فضلت تفكر فيه
والفكر( ديب)
انيابه بتاكلها ..
..
والفرسة ما بقتشى
ولما جربت تمشى
ولا حد بصلها..
..
بكت عنيها دموع
سألت جمالها رجوع؟
..
ضحك الزمن ساخر
وقال ماليش سلطان..
..
انتى ال خسرانه
وال بيتعــــــالى.
زيـــــــــك زمان
عمرو ما كان كسبان...
...........................................
وتوتوتة توتة
هنا
خلصت الحدوته
لصبية مغرورة ياما جننت صبيان....
.......................................................سالم هاشم